Microcement: samskeytalaus áferð á gólf, veggi og baðherbergi

Microcement er skrautáferð úr sementi, fjölliðum, trefjum og örfínum steinefnum. Efnið er dregið upp með spaða í þunnum lögum, pússað á milli og lakkað í lokin. Útkoman er samfelldur flötur, 2–3 mm þykkur, með lifandi áferð sem minnir á steypu en er hlýrri og mýkri viðkomu.

Af því að lagið er svona þunnt þarf hvorki að brjóta út gamlar flísar né hækka gólf. Við grunnum það sem fyrir er, styrkjum með neti og leggjum beint ofan á. Það sparar tíma, kostnað og rask, og er ástæðan fyrir því að microcement er orðið fyrsta val margra þegar baðherbergi eða gólf fær nýtt líf.

Nafnið ruglar marga: microcement, microsement og míkrósement er allt sama efnið. Microcement er alþjóðlega heitið og við notum það hér, en þú finnur okkur undir öllum þremur.

• 

  Gólf, einbýlishús í Reykjavík

• 

  Sturta, vatnshelt í hverju lagi

• 

  Eldhúseyja, Garðabæ

Við vinnum með tveimur gerðum af microcementi. Tilbúið deig úr fötu sem er vatnshelt í hverju einasta lagi, ekki bara í lakkinu. Það notum við í votrými og á borðplötur, af því að það dökknar ekki þótt vatn komist að því. Og duft sem er hrært með vatni, með mjög hátt þrýstiþol og brunaflokk A1. Það hentar best á stór gólf og veggi í þurrum rýmum.

Lagskiptingin er sú sama í báðum: grunnur og net, tvö grunnlög, tvö yfirborðslög, porufyllir og lakk. Sjö lög sem saman verða þrír millimetrar. Smelltu á lögin hér fyrir neðan til að sjá hvað hvert þeirra gerir.

Verðið ræðst af fermetrum, undirlagi og hversu margir fletir eru lagðir. Gólf eitt og sér er ódýrara á fermetrann en gólf, veggir og sturta saman, og lítil verk eru dýrari á fermetrann en stór, því fötur, kantar og þurrktími vega jafn þungt hvort sem rýmið er fjórir fermetrar eða fjörutíu.

Í verðinu er allt sem þarf: undirbúningur, grunnur og net, fjórar umferðir af microcementi, porufyllir og lakk. Sendu okkur myndir af rýminu og fermetra og þú færð skriflegt tilboð samdægurs, ókeypis.

Meðalbaðherbergi tekur um viku, þar af er meira en helmingurinn þurrktími á milli umferða. Við gefum alltaf upp tvö möguleg tímabil fyrir verkið í stað þess að lofa einni dagsetningu, því þurrktíminn ræðst af hita og raka í húsinu.

1. Dagur 1

   Undirbúningur. Flísar slípaðar og fúgur jafnaðar, gólf ryksugað og allt teipað af. Grunnur borinn á og glertrefjanet lagt í hann.

2. Dagur 2–3

   Grunnlög 1 og 2. Grófkorna microcement, einn millimetri hvort lag, pússað á milli. Eftir annað lagið sést netið ekki lengur.

3. Dagur 3–4

   Yfirborðslög 1 og 2. Fína lagið sem gefur áferðina og litinn. Hér verða spaðaförin til sem gera hvert verk einstakt.

4. Dagur 5–6

   Porufyllir og tvær til þrjár umferðir af tvíþátta lakki, sólarhringur á milli umferða.

5. Dagur 7

   Ganga má varlega í sokkum. Létt húsgögn eftir tvo daga, vatn og sturta eftir viku, fullharðnað eftir mánuð.

Tugir staðallita, frá hvítu og beis yfir í djúpgrátt og svart, og hægt er að blanda sérlit eftir kóða. Áferðin ræðst af korninu og spaðanum: fínkorna gefur rólega, slétta áferð á veggi, miðlungskorn meira líf og betra grip á gólfi. Lakkið er matt eða satín.

Við komum með lökkuð sýnishorn heim til þín svo þú sjáir litinn í réttri birtu, og sýnishorn eru líka til hjá Gólfefnabúðinni. Sendu okkur gjarnan Pinterest-myndir af því sem þú ert með í huga, þá finnum við lit og áferð sem passar.

• 

  Fínkorna áferð á vegg

• 

  Dökkt gólf, miðlungskorn

• 

  Borðplata, satínlakk

Rakur klútur og hlutlaus sápa, ekkert annað. Mottur í sturtu og undir þungum húsgögnum lengja endinguna, og filttappar undir stóla og borð eru sjálfsagðir eins og á parketi. Lakkið má endurnýja eftir mörg ár án þess að snerta efnið sjálft.

Komi sprunga eða skemmd má gera við hana staðbundið. Við geymum litakóðann á hverju verki svo viðgerðin passi.