Epoxýgólf og flotgólf: bílskúrar, verslanir og vinnurými

Bílskúrsgólf úr steypu drekkur í sig olíu og salt og rykar með árunum. Epoxý lokar því alveg. Við slípum steypuna, grunnum og leggjum tvær umferðir af tveggja þátta epoxý, með eða án flagna. Útkoman er hart, glansandi eða matt gólf sem er þrifið með kústi og vatni.

Verkið tekur tvo daga. Gengið er á gólfinu eftir sólarhring og bíllinn fer inn eftir fimm til sjö daga, þegar efnið er fullharðnað.

Epoxý hentar líka í þvottahús, geymslur, verkstæði og iðnaðarhúsnæði, alls staðar þar sem álagið er mest og útlitið má vera einfalt.

Flotgólf er sementsbundið efni sem er hellt út og jafnar sig sjálft. Það gefur alveg sléttan flöt án spaðafara, og lakkað flot, stundum kallað sjónflot, er vinsælt í verslunum, skrifstofum og vinnurýmum þar sem vantar einsleitt, rólegt gólf á hagstæðu verði.

Flot er líka undirlagið sem við notum þegar gamla gólfið er ójafnt og á að fá microcement eða epoxý ofan á.

Bílskúrsgólf er einfaldasta verkið okkar og þess vegna það ódýrasta á fermetrann. Verðið hækkar með ástandi steypunnar, fjölda kanta og því hvort þarf að flota fyrst.